Afghanistan Pakistan border tension: અફઘાનિસ્તાનનો પાકિસ્તાનને વળતો જવાબ, ISISના ઠેકાણાઓ પર કરી સર્જિકલ સ્ટ્રાઈક

Afghanistan Pakistan border tension: અફઘાનિસ્તાન અને પાકિસ્તાન વચ્ચે સરહદી તણાવ ફરી એકવાર ચરમસીમાએ પહોંચ્યો છે. તાજેતરમં પાકિસ્તાને કરેલા હવાઈ હુમલાઓના જવાબમાં અફઘાનિસ્તાનની તાલિબાન સરકારે બલૂચિસ્તાન અને ખૈબર પખ્તુનખ્વાના વિસ્તારોમાં એરસ્ટ્રાઈક કરવાનો દાવો કર્યો છે. બંને દેશો વચ્ચેની આ હિંસક કાર્યવાહીથી દક્ષિણ એશિયામાં સુરક્ષા વ્યવસ્થા સામે મોટું સંકટ ઊભું થયું છે. આ ઘટનાક્રમ પાડોશી દેશો વચ્ચેના વધતા વૈમનસ્ય અને વધતી જતી સૈન્ય ગતિવિધિઓને સ્પષ્ટ કરે છે.

Afghanistan Pakistan border tension: અફઘાનિસ્તાનનો વળતો પ્રહાર

તાલિબાન સરકારના સંરક્ષણ મંત્રાલયે પાકિસ્તાનની સરહદમાં ઘૂસીને હવાઈ હુમલા કર્યા છે. આ કાર્યવાહી ખાસ કરીને બલૂચિસ્તાન અને ખૈબર પખ્તુનખ્વા પ્રાંતોમાં આવેલા ISISના ઠેકાણાઓને નિશાન બનાવીને કરવામાં આવી હતી. તાલિબાનનું માનવું છે કે આ કેન્દ્રો દ્વારા અફઘાનિસ્તાનમાં સામાન્ય નાગરિકો પર આતંકી હુમલાની યોજનાઓ બનાવવામાં આવતી હતી. આ હુમલાઓમાં અનેક ISIS આતંકવાદીઓ માર્યા ગયા છે અને તેમના અડ્ડાઓને મોટું નુકસાન પહોંચ્યું છે. તાલિબાનના દાવા મુજબ આ કાર્યવાહી દરમિયાન કોઈ પણ નાગરિકના જીવનું નુકસાન થયું નથી અને ભવિષ્યમાં પણ સુરક્ષા માટે આવા કઠોર પગલાં લેવાનું જારી રહેશે.

Afghanistan Pakistan border tension: પાકિસ્તાનનો દાવો અને આકરો વિરોધ

પાકિસ્તાની સેનાએ અફઘાનિસ્તાનના આ હવાઈ હુમલાઓની પુષ્ટિ કરી છે. પાકિસ્તાને દાવો કર્યો છે કે તેમની એર ડિફેન્સ સિસ્ટમે બલૂચિસ્તાન તરફ મોકલવામાં આવેલા 4 અફઘાન ડ્રોનને તોડી પાડ્યા છે. પાકિસ્તાની સેનાનું કહેવું છે કે તેમની અત્યાધુનિક ટેકનોલોજી દ્વારા આ ડ્રોનને સમયસર ઓળખી લેવામાં આવ્યા હતા. પાકિસ્તાને તાલિબાનની આ કાર્યવાહીને ગેરજવાબદાર ગણાવી છે. તેમના મતે આવી હરકતોથી અફઘાનિસ્તાનના સામાન્ય લોકોની મુશ્કેલીઓમાં વધુ વધારો થશે.

સરહદી હિંસાનો ઈતિહાસ અને માનવીય ખુવારી

પાકિસ્તાને રવિવારે અફઘાન સરહદ પાસે અનેક સ્થળોએ ભારે હવાઈ હુમલા કર્યા હતા. યુનાઈટેડ નેશન્સ આસિસ્ટન્સ મિશન મુજબ આ હુમલામાં 28 નાગરિકો માર્યા ગયા અને 49 લોકો ઘાયલ થયા હતા. મળતા અહેવાલ મુજબ આ સંખ્યા ઘણી વધારે છે અને તેમાં 36 લોકોના મોત થયા છે અને 160 થી વધુ લોકો ઘાયલ થયા છે. આ ઘટનાક્રમ પહેલા 16 માર્ચના રોજ પાકિસ્તાને ઓમિદ ડ્રગ રિહેબિલિટેશન સેન્ટર પર હુમલો કર્યો હતો. તે હુમલામાં 408 લોકોના મોત અને 265 લોકો ઘાયલ થયા હતા, જેમાં મોટાભાગના દર્દીઓ હતા.

સતત વધતો તણાવ

બંને દેશો વચ્ચે છેલ્લા કેટલાક સમયથી સતત તણાવ જોવા મળી રહ્યો છે. પાકિસ્તાન સતત આરોપ લગાવે છે કે અફઘાનિસ્તાન તેમની ધરતી પર હુમલા કરનાર આતંકવાદીઓને આશ્રય આપે છે. બીજી તરફ તાલિબાન સરકાર આવા દરેક આરોપોનો સખત શબ્દોમાં નકાર કરે છે. ઓક્ટોબર મહિનામાં બંને દેશો વચ્ચે સીઝફાયર પર સહમતી સધાઈ હતી, પરંતુ હાલની સ્થિતિ જોતા તે કરારનું અસ્તિત્વ જોખમમાં જણાય છે. આ સરહદી સંઘર્ષ હવે બંને પાડોશી દેશો માટે ગંભીર સુરક્ષા ચિંતાનો વિષય બની ગયો છે.

આ પણ વાંચો--- Donald Trump Supreme Court : અમેરિકી સુપ્રીમ કોર્ટે રાષ્ટ્રપતિને આપી અત્યાર સુધીની સૌથી મોટી સત્તા, 91 વર્ષ જૂનો કાયદો પલટાયો