Agra-Lucknow Expressway accident: ઉન્નાવમાં કાળમુખો અકસ્માત, આગ્રા-લખનઉ એક્સપ્રેસવે પર કાર અને બસની ટક્કર, 5ના મોત

Agra-Lucknow Expressway accident: ઉત્તર પ્રદેશના ઉન્નાવ જિલ્લામાં બુધવારે સવારે (1 જુલાઈ 2026) એક અત્યંત ગમખ્વાર માર્ગ અકસ્માત થયો છે. આગ્રા-લખનઉ એક્સપ્રેસવે પર એક ઝડપી સ્લીપર બસ અને કાર વચ્ચે થયેલી ભીષણ ટક્કરમાં 5 લોકોના ઘટનાસ્થળે જ મોત નીપજ્યા છે. આ અકસ્માતમાં કારમાં સવાર અને બસના અન્ય 20 જેટલા મુસાફરો ઈજાગ્રસ્ત થયા છે. અકસ્માત બાદ સ્થાનિક વહીવટીતંત્ર અને પોલીસ દ્વારા તાત્કાલિક રાહત અને બચાવ કામગીરી શરૂ કરવામાં આવી હતી. આ ઘટનાએ ફરી એકવાર હાઈવે પરની સુરક્ષા અંગે ચિંતા વધારી દીધી છે.

Agra-Lucknow Expressway accident: ઓવરસ્પીડમાં બેકાબૂ થઈ કાર

આ દુર્ઘટના ઉન્નાવ જિલ્લાના બાંગરમૌ કોતવાલી વિસ્તારમાં 230.800 માઈલ સ્ટોન પાસે બની હતી. બુધવારે સવારે અંદાજે 5 વાગ્યે એક તેજ રફ્તાર બસ અનિયંત્રિત બની હતી. આ બસ આગળ જતી કાર સાથે જોરદાર અથડાઈ હતી. ટક્કર એટલી પ્રચંડ હતી કે, બસ ડિવાઈડરની ગ્રીલ તોડીને ખાડામાં પલટી ગઈ હતી. આ અકસ્માતને કારણે હાઈવે પર ટ્રાફિકની સમસ્યા સર્જાઈ હતી.

Agra-Lucknow Expressway accident: પીડિતોની વિગત

અકસ્માતનો ભોગ બનેલી કારમાં કુલ 8 લોકો સવાર હતા. જેમાંથી 5 લોકોના સ્થળ પર જ પ્રાણ પંખેરું ઉડી ગયા હતા. મૃતકોમાં 13 વર્ષની દિવ્યા, 5 વર્ષની અમૃતા, 40 વર્ષની અંજૂ, 60 વર્ષની ધુનમુન અને 45 વર્ષના કાર ચાલક વિનોદનો સમાવેશ થાય છે. કારમાં સવાર અન્ય 3 લોકો ગંભીર રીતે ઈજાગ્રસ્ત થયા છે. તેમને બાંગરમૌ સીએચસીમાં પ્રાથમિક સારવાર આપીને લખનઉ ટ્રોમા સેન્ટર ખાતે રિફર કરવામાં આવ્યા છે.

બસમાં સવાર મુસાફરોની સ્થિતિ

અકસ્માતગ્રસ્ત બસમાં કુલ 85 મુસાફરો સફર કરી રહ્યા હતા. બસ ખાડામાં પલટી જવાથી તેમાં સવાર 17 થી વધુ મુસાફરોને પણ નાની-મોટી ઈજાઓ પહોંચી છે. પોલીસ અને સ્થાનિક અધિકારીઓએ ઘટનાસ્થળે પહોંચીને ઈજાગ્રસ્તોને તાત્કાલિક હોસ્પિટલ પહોંચાડવાની વ્યવસ્થા કરી હતી. અધિકારીઓ ઈજાગ્રસ્તોને યોગ્ય સારવાર મળે તે બાબતે દેખરેખ રાખી રહ્યા છે.

વહીવટી કાર્યવાહી

ઘટનાની જાણ થતા જ જિલ્લાના ઉચ્ચ અધિકારીઓ સ્થળ પર પહોંચ્યા હતા. પોલીસ ટીમે અકસ્માતગ્રસ્ત કાર અને બસને હાઈવે પરથી હટાવીને ટ્રાફિક વ્યવસ્થા સામાન્ય બનાવી હતી. મૃતકોના પાર્થિવ દેહને પોસ્ટમોર્ટમ માટે સીએચસી મોકલી આપવામાં આવ્યા છે. હાલમાં પોલીસ દ્વારા અકસ્માતના ચોક્કસ કારણોની તપાસ કરવામાં આવી રહી છે. બાંગરમૌ પોલીસ આ સમગ્ર મામલે કાયદેસરની કાર્યવાહી હાથ ધરી રહી છે.

આ પણ વાંચો--- Rajasthan dausa accident: દૌસામાં ટ્રક સાથે અથડાતા સ્લીપર બસ સળગી ઉઠી, 8 મુસાફરના મોત, 20થી વધુ ઈજાગ્રસ્ત