Junagadh પંથકમાં મેઘરાજાની મહેર, કેશોદ અને માળિયાહાટીનામાં ધીમી ધારે વરસાદથી ખેડૂતોમાં આનંદની લાગણી
Junagadh : હાલમાં સમગ્ર સૌરાષ્ટ્રમાં મેઘરાજાના આગમનની પ્રતીક્ષા વચ્ચે જૂનાગઢ જિલ્લાના કેટલાક વિસ્તારોમાં વરસાદી માહોલ જામ્યો છે. કેશોદ અને માળિયાહાટીના પંથકમાં આજે વાતાવરણમાં આવેલા પલટા બાદ ધીમી ધારે વરસાદ શરૂ થતાં ધરતીપુત્રોમાં ખુશીની લહેર જોવા મળી રહી છે.
જૂનાગઢમાં છેલ્લા 24 કલાકથી વરસાદી માહોલ છે
છેલ્લા કેટલાક સમયથી ખેડૂતો આતુરતાપૂર્વક સારા વરસાદની રાહ જોઈ રહ્યા હતા. આજે માળિયાહાટીના તાલુકાના ગળોદર, ગડુ અને આંબેચા જેવા ગ્રામ્ય વિસ્તારોમાં મેઘરાજાએ મહેર વરસાવતા વાતાવરણમાં ઠંડક પ્રસરી ગઈ છે. ધીમી ધારે પડતા આ વરસાદને કારણે ખેડૂતોના ચહેરા પર આનંદ જોવા મળી રહ્યો છે.
ખેતીના દૃષ્ટિકોણથી વાત કરવામાં આવે તો, આ વરસાદ ખેતી માટે ખૂબ જ આશીર્વાદરૂપ સાબિત થશે. હાલમાં ખેતરોમાં મગફળી અને કપાસના પાકનું વાવેતર કરવામાં આવ્યું છે. પાકને અત્યારે પાણીની ખૂબ જરૂર હતી, ત્યારે આ વરસાદથી પાકને નવજીવન મળશે અને ઉત્પાદનમાં પણ વધારો થવાની સંભાવના છે. કૃષિ નિષ્ણાતોના મતે, આ સમયનો વરસાદ પાક માટે અત્યંત ફાયદાકારક છે.
ખેતીની તૈયારીઓમાં વધુ તેજી આવશે
ગ્રામ્ય વિસ્તારોમાં વરસાદને કારણે ખેડૂતોમાં ઉત્સાહનો માહોલ છે. જોકે, માત્ર ધીમી ધારે વરસાદથી સંતોષ ન માનતા ખેડૂતો હવે મેઘરાજા મન મૂકીને વરસે તેવી આશા રાખી રહ્યા છે. જો આગામી દિવસોમાં સારો ધોધમાર વરસાદ પડે, તો નદી-નાળા જીવંત થશે અને ભૂગર્ભ જળના સ્તરમાં પણ નોંધપાત્ર વધારો થશે, જે સમગ્ર વર્ષ દરમિયાન પીવાના પાણી અને સિંચાઈની સમસ્યાને હળવી કરવામાં મદદરૂપ થશે.
